Rusiyanın neft və qazını baha alanlar cəzalandırılacaq

Rusiya prezidenti Vladimir Putin ötən gün Vladivostokda keçirilən Şərq İqtisadi Forumunda çıxışı zamanı dünyaya yeni mesajlar verib.

Reyting.az bildirir ki, Putin sanksiyalardan ən çox avropalıların əziyyət çəkdiyini deyib və Qərbin Rusiyaya tətbiq etdiyi sanksiyaların dünya iqtisadiyyatı üçün ən böyük təhlükə olduğunu bildirib.

Putin diqqətə çatdırıb ki, Qərbin sanksiya atəşi digər ölkələrə qarşı davranış nümunələri tətbiq etmək, onları suverenliklərindən məhrum etmək və onları öz iradələrinə tabe etmək üçün aqressiv cəhdlərdir.

Prezident Putin deyib ki, G7 və Avropa Birliyinin Rusiyanın neft və qaz məhsullarına tavan qiymət tətbiq etmə planları maraqlarına zidd olarsa, bu planlara əməl edən ölkələrə həmin məhsulları göndərməyəcəklər.

Kasıb ölkələrin ərzağa çatmaqda çətinlik çəkdiyini xatırladan Putin, taxıl müqaviləsinə də diqqət çəkərək bildirib ki, Türkiyə vasitəçi olmasaydı, bu taxıl ehtiyacı olan ölkələrə deyil, Avropaya daşınardı.

Asiya-Sakit okean ölkələrinin cazibə mərkəzinə çevrildiyini iddia edən Putin “Qərb ölkələri tarixin gedişatını dəyişdirmək üçün əsrlər boyu qurulan qlobal iqtisadi sistemin əsaslarını sarsıdır”,- deyərək, dollara, avroya və sterlinqə etimadın azaldığını xatırladıb.

Putin “Qazprom” və onun çinli tərəfdaşının qaz tədarükü prosesində rubl və yuan valyutalarına yarıbayarı keçmək qərarına gəldiklərini xüsusi vurğulayıb.

Putin Ukrayna savaşından da bəhs edib. Deyib ki, Rusiya Ukraynada heç nə itirməyib və itirməyəcək də.

Putin forumda iştirak edən baş nazirlərlə də ayrı-ayrılıqda görüşüb. Amma ən diqqət çəkən görüş Myanmanın çevrilişçi baş naziri Min Aunq Hlainqlə olub. “Rusiya prezidenti olaraq sizə müraciət etməyəcəyəm. Mən sizə dünya lideri kimi müraciət edəcəyəm. Çünki siz dünyada sabitliyi təmin edirsiniz”,-Hlainq deyib.

Xatırladaq ki, Putinin gələn həftə Özbəkistanda Çin prezidenti Si Cinpinlə görüşəcəyi gözlənilir.

Rusiya və Ukrayna arasında müharibə davam edərkən, cəbhə xəttində yerləşən Zaporojya Atom Elektrik Stansiyasının vəziyyəti ilə bağlı BMT-nin planı bəlli olub. Beynəlxalq Atom Enerjisi Agentliyinin (MAQATE) hesabatında stansiya ətrafında təhlükəsizlik zonası yaradılması tələbindən sonra BMT-nin Baş katibi Antonio Quterreş də stansiyanın ətrafında silahsızlaşdırılmış zona yaradılmasını istəyib. Bu çağırışı Ukrayna prezidenti Volodimir Zelenski də alqışlayıb və regionun silahsızlaşdırılacağı təqdirdə bu təklifi dəstəklədiyini bildirib. Bununla belə, Rusiyanın xarici işlər naziri Sergey Lavrov deyib ki, Moskvanın BMT-nin planını şərh etmək üçün daha çox təfərrüata ehtiyacı var. Rusiyanın BMT-dəki səfiri Vasili Nebenzia isə bildirib ki, demilitarizasiya zonasının yaradılması təklifi ciddi deyil.

Digər tərəfdən, Kiyev rəhbərliyinin dizel generatorları ilə canlı saxlanılan atom elektrik stansiyasını bağlamağı düşündüyü iddia edilib. Ukrayna administrasiyasının nüvə təhlükəsizliyi üzrə eksperti O. Korikov deyib ki, generatorlarda yanacaq tükənə və bu, nüvə fəlakətinə səbəb ola bilər.

Avropa İttifaqı (Aİ) Komissiyasının sədri Ursula fon der Leyen enerji böhranına doğru addım atarkən Rusiya qazı üçün tavan qiyməti təklif edəcəklərini açıqlayıb. Rusiyanın təbii qaz bazarlarını aktiv şəkildə manipulyasiya etdiyini bildirən Leyen, 5 bəndlik planı izah edib. Beləliklə, dekabr ayından başlayaraq Rusiyanın qaz, neft və neft məhsullarına standart qiymət müəyyənləşəcək. Bu qiymətə əməl etməyən, yəni həmin məhsulları baha alanların tankerləri sığortalanmayacaq.