İsrailli general: Regional müharibəyə başlasaq tək qalacağıq

İran və “Hizbullah”a qarşı qabaqlayıcı hücum İsrail ordusunun öhdəsindən gələ bilməyəcəyi regional müharibəyə səbəb ola bilər. ABŞ-nın dəstəyi olmadan Tel-Əviv bu müharibənin qarşısında duruş gətirə bilməz.

Reyting.az xəbər verir ki, bu sözləri İsrailin istefada olan general-mayoru Yitzhak Brik deyib.

Y. Brik düşünür ki, İsrail sürətlə ABŞ-dan tamamilə asılı olan regional müharibəyə doğru irəliləyir.

“Bu yaxınlarda İsrail ordusu üçün narahatedici vəziyyəti hələ dərk etməyən bəzi adamların İran və “Hizbullah”ın cavab verməsindən əvvəl qabaqlayıcı zərbə endirilməsinin lazım olduğunu söylədiklərini eşitdik. Təəssüf ki, bu insanlar “Hizbullah”a və İrana qarşı hər hansı qabaqlayıcı zərbənin dərhal regional müharibəyə səbəb olacağını dərk etmirlər”, - deyə Y. Brik əlavə edib.

İsrailin qabaqlayıcı hücuma keçəcəyi təqdirdə yaşayış məntəqələri, elektrik stansiyaları, yanacaqdoldurma məntəqələri, sənaye infrastrukturu və hərbi bazaların hər gün minlərlə raket və pilotsuz təyyarə ilə hücuma məruz qalacağını deyən Brikin sözlərinə görə, İsrail ordusu öz bölgəsinə qarşı regional müharibəyə cavab verə, milli infrastrukturunu qura bilməyəcək. Çünki onun İranı, “Hizbullah”ı və onların müvəkkillərini məğlub etmək gücü yoxdur.

General-mayor izah edib ki, İran və “Hizbullah”a qarşı hər hansı qabaqlayıcı hücum regional müharibəyə gətirib çıxara bilər, lakin İran və “Hizbullah”dan gözlənilən cavab yumşaq olarsa, regional müharibə ehtimalı dəqiq deyil.

İstənilən halda İsrail ordusunun regional müharibə ilə təkbaşına mübarizə apara bilməyəcəyini, ordunun təkbaşına müqavimət göstərmək gücünə malik olmadığını və ABŞ-nın köməyinə ehtiyacı olduğunu vurğulayan Brik əlavə edib ki, İsrailin regional müharibədə sağ qalması tamamilə ABŞ-dan asılıdır.

General deyib ki, ABŞ prezidenti Co Bayden İsrailin baş naziri Benyamin Netanyahunun qabaqlayıcı zərbə endirməsinə mane olub və bildirib ki, əgər ABŞ-nın razılığı olmadan İsrail belə bir addım atarsa və sonradan regional müharibə baş verərsə, İsrailin yanında olmayacaqlar.

“Məncə, Bayden Netanyahuya deyib ki, “Hizbullah” və İran qırmızı xətti keçərsə və İsrail vətəndaşları böyük zərər görərsə, Birləşmiş Ştatlar İran və “Hizbullah”ın hərbi və iqtisadi hədəflərinə şiddətli hücuma keçmək üçün İsraillə birlikdə işləyəcək. Əks təqdirdə Netanyahu Baydenə qulaq asmasa, mümkün müharibədə tək qalacağıq”,- Brik qeyd edib.

E. KAMAL